నా మదిలో ...

ఈ మధ్య చూసిన సినిమాలు:

The Prestige: ఇది ఇద్దరు మాంత్రికుల మధ్య జరిగే పోరు. ఒకరి ట్రిక్కులు ని మరిపించడానికి ఇంకొకరు ఎంత దూరమయినా వెళతారు. ఆఖరికి చంపడానికి, వారి రహస్యాలను తెలుసుకోడానికి గూఢచారులను కూడా వాడతారు. ఆఖరికి ఇతరులను భ్రమింప చేసే ఉత్తుత్తి మాజిక్ కాకుండా నిజమయిన మాజిక్ వారికి అనుభవంలోకొస్తుంది. ఇంటరెస్టింగ్ అయిన సినిమా.

నా రేటింగ్: 4/5

Before Sunrise / Before Sunset: ఈ సినిమాలు నా జీవితంలో చూసిన వాటిలో మొదటి పది స్థానాల్లో తప్పకుండా ఉంటాయి. ఈ సినిమాల గురించి చెప్పనలవి కాదు చూడవలసిందే. ఒక అబ్బాయి, ఒక అమ్మాయి ఒక ట్రైన్ లో కలుసుకుంటారు. పరిచయమవుతుంది. ఇద్దరూ కలిసి ఒక రాత్రి ఆ పట్టణంలో గడుపుదామని నిర్ణయించుకుంటారు. ఇక సినిమా మొత్తం వారు మాట్లాడుకొవడమే. అది ఎంత ఆసక్తికరంగా ఉంటుందో చెప్పనలవి కాదు. చూడవలసిందే. వారు అలా మాట్లాడుకుంటూ ఒకరితో ఒకరు ప్రేమలో పడతారు. చివరికి పొద్దు పొడవడంతో ఇద్దరూ విడిపోతారు. విడిపోతూ ఆరు నెలల తరవాత అదే ప్రదేశంలో కలుద్దామని నిర్ణయించుకుంటారు. అక్కడితో Before Sunrise ముగుస్తుంది.

దాని సీక్వెల్ Before Sunset. ఇది కూడా చాలా బాగుంది. మొదటి పార్ట్ లో విడిపోయిన ఇద్దరూ పదేళ్ళ తరవాత కలుసుకుంటారు. ఆరు నెలల తరవాత కలుసుకుందామనుకున్న వాళ్ళు కొన్ని కారణాల వల్ల కలుసుకోడానికి కుదరదు. ఆ తరవాత ఆ అబ్బాయి వారి కథని పుస్తకంలా రాస్తే అది పెద్ద హిట్ అవుతుంది. ఆ పుస్తక ప్రచారంలో భాగంగా ఆ అమ్మాయి ఉండే పట్టణానికి వస్తాడు. అక్కడ ఇద్దరూ కలుసుకుంటారు. ఈ సారి సినిమా ఒక రోజు మొత్తం ఇద్దరూ గడపడం గురించి.

మంచి సినిమాలు చూసిన అనుభూతి కలిగింది చాన్నాళ్ళ తరవాత.

నా రేటింగ్: 5/5

Little Miss Sunshine: అనుబంధాలు సరిగా లేని ఒక కుటుంబ కథ ఇది. ఇందులో ఒక చిన్నారికి ఒక బ్యూటీ కాంటెస్ట్ లో పాల్గొనే అవకాశం వస్తుంది. కానీ దాంట్లో పాల్గొనడానికి ఎన్నో అడ్డంకులు. కానీ ఆ అడ్డంకులు అన్నీ దాటి, ఆ చిన్నారి సంతోషం కోసం కుటుంబం అంతా ఒకటయి ఎలా ముగుస్తుందో చూడవలసిందే. మంచి సినిమా.

నా రేటింగ్: 3.5/5

Children of Men: ఫ్రాంక్ గా చెప్పాలంటే ఈ సినిమా తో నేను కనెక్ట్ అవ్వలేదు అనడం సరయినదేమో. ఇందులో భవిష్యత్ లో జనాలకు పిల్లలను కనే సామర్థ్యాన్ని కోల్పోతారు. అలాంటి పరిస్థితుల్లో ఒక అమ్మాయి ప్రెగ్నెంట్ అవుతుంది. కొందరు ఎక్స్ట్రీమిస్టులు ఆ అమ్మాయిని చంపడానికి, లేదా ఉపయోగించుకోవడానికి ప్రయత్నిస్తుంటారు. ఆ అమ్మాయిని కొంత మంది కలిసి ఎలా కాపాడతారొ అనేదే చిత్రం కథ. ఎన్నో అంశాలను స్పృశిస్తుంది. ఎన్నో మంచి పెర్ఫార్మెన్సులు.

నా రేటింగ్: 3/5 (ఇంకా ఎక్కువివ్వాలి కానీ నాకు అంతగా కిల్క్ అవ్వలేదు.)

The Guardian: ఇది కోస్ట్ గార్డ్స్ కథ. కోస్ట్ గార్డ్స్ జీవితం ఎంత కష్టమో, వారికి ఎంత డెడికేషన్ కావాలో, వారినెలా తీర్చిదిద్దుతారో అనేదే కథ స్థూలంగా. ఒకే ఒకే సినిమా.

నా రేటింగ్: 3/5

Apocalypto: ఇందులో ఒక ఆదివాసీ తెగ ఉంటుంది. వారిని గెలిచి వారిని బానిసలౌగా చేసుకోడానికి ఇంకో తెగ వారి మీద దండెత్తుతుంది. అందరినీ కట్టి తీసుకెళ్ళి కొంత మందిని బానిసలుగానూ, కొంత మందిని బలి గానూ ఇచ్చేస్తారు. అందులో ఒకడు మాత్రం తప్పించుకుంటాడు ఆఖరికి. ఈ కథ ఎన్నో ఆలోచనలను రేకెత్తిస్తుంది. ఈ రోజు మానవుడు చేసే ఆకృత్యాలు మనకు దాదాపుగా అలాగే కనిపిస్తాయి. తన లాభం కోసం ఇతరుల ప్రదేశాలను ఆక్రమించుకోవడం, ఇతరులను బానిసలుగా చేసుకోవడానికి ప్రయత్నించడం మొదలయినవి. మంచి సినిమా కానీ ఇందులొ వయోలెన్స్ మోతాదు చాలా ఎక్కువ.

నా రేటింగ్: 4/5

300: దీని గురించి అందరికీ తెలిసిందే. అంతో ఎంజాయ్ చేసాను ఈ సినిమా. అద్భుతంగా ఉంది. మూడొందల మంది వీరులు ఓటమిని ఒప్పుకోకుండా ఎన్నో వేల మంది సైన్యాన్ని ఎదురొడ్డి ఎలా పోరాడుతారో అనేదే కథ. చిన్నప్పటి నుండీ వీరు వీరులగానే, ఓటమి, భ్యం అనేది తెలియని వారుగా పెరుగుతారు. అందుకని చావో రేవో తేల్చుకోవాల్సి వచ్చినప్పుడు యుద్ధం చేసి అవతల ప్రత్యర్థిని మట్టి కరిపించి చావడానికే నిర్ణయించుకుంటాడు నాయకుడు. మిగతా వారు అంగీకరించకపోవడంతో ఒక మూడొందల మందిని తీసుకుని వారితోనే యుద్ధం చేస్తాడు. అత్యంత ఉత్తమమయిన ప్రమాణాలతో ఉన్నాయి గ్రాఫిక్స్ ఈ సినిమాలో. అద్భుతం.

నా రేటింగ్: 5/5

The Holiday: ఇద్దరు అమ్మాయిల కథ ఇది. వీరిద్దరూ విభిన్న పరిస్థితులలో ఉంటారు. ఒకరు ఎంతో ధనికురాలు, ఇంకొకరు కటిక పేద. ఇద్దరూ ఒక నెల రోజులు తమ ఇళ్ళు మార్చుకుని జీవించడానికి ప్రయత్నిస్తారు. ఆ రోజులలో వారు ఎలాంటి అనుభవాలు పొందారన్నదే ఈ సినిమా. బానే ఉంది. కానీ ఇందులో కేట్ విన్స్లెట్ ఎంతో ముసలిదానిలా ఉంది. ప్చ్...

నా రేటింగ్: 2.5/5

Hanuman: ఆనిమేషన్ సినిమా ఇది. మనకు తెలిసిన రామాయణం కథే ఇది. అందులో హనుమంతుని కథ. బాగుంది. పిల్లలకు ఎంతగానో నచ్చుతుంది. దీంట్లో చిరంజీవి గొంతు అరువిచ్చారు.

నా రేటింగ్: 3.5/5

జగడం: జగడం, వయోలెన్స్ ఈ కాలంలో ఎలా ఫాషన్ గా మారుతుందో అన్నది ఈ కథ. చెడు వైపు ఆకర్షితుడయిన ఒకడు ఎలా అందులో కొట్టుకుపోతాడో, చివరికి అతని జీవితాన్ని అది ఎలా మార్చేస్తుందో అనేదే ఈ కథ. తెలుసుగా ఇలాంటి సినిమాల్లో సినిమా అంతా వయోలెన్స్ ని త్రీడీలో చూపించి చివరకు ఇలా చెయ్యద్దు అని చెబుతారు. అలాంటి కథే. పెద్ద చూడాల్సిన సినిమా కాదు.

నా రేటింగ్: 2/5

ఇంకా ఉన్నాయి కానీ ఇక ఆపేస్తాను.